مدعی کے مطابق واٹس ایپ پیغام میں ایک شخص نے پشتو زبان میں دھمکی دی کہ رقم نہ دی گئی تو لڑکی سے ہاتھ دھو بیٹھیں گے
راولپنڈی کی 20 سالہ لڑکی گھر سے غائب ہوکر دبئی پہنچ گئی جس کے بعد اغواکاروں کا فون آیا جنہوں نے اہل خانہ سے دو کروڑ روپے تاوان مانگ لیا۔
پولیس کے مطابق راولپنڈی کے تھانہ چکلالہ کے علاقے افضل ٹان سے 20 سالہ لڑکی کے پراسرار حالات میں لاپتا ہونے کا معاملہ سامنے آیا ہے جس کے بعد اہلِ خانہ سے واٹس ایپ کے ذریعے دو کروڑ روپے تاوان کا مطالبہ بھی کیا گیا ہے۔ واقعے نے اس وقت نیا رخ اختیار کر لیا جب تفتیش کے دوران لڑکی کے دبئی پہنچنے کی اطلاعات سامنے آئیں۔
پولیس کے مطابق مغویہ کے بھائی کی مدعیت میں مقدمہ درج کر لیا گیا ہے، مدعی مقدمہ نے پولیس کو بتایا کہ 30 دسمبر کو اس کی 20 سالہ ہمشیرہ گھر سے میڈیکل اسٹور جانے کے لیے نکلی تاہم کافی دیر گزرنے کے باوجود واپس نہ آئی۔ اہلِ خانہ نے رابطہ کرنے کی کوشش کی تو لڑکی کا موبائل فون بند ملتا رہا۔ تلاش کے باوجود کوئی سراغ نہ ملا، بعدازاں مغویہ کے واٹس ایپ نمبر سے ایک پیغام موصول ہوا۔
مدعی کے مطابق واٹس ایپ پیغام میں ایک نامعلوم شخص پشتو زبان میں بات کر رہا تھا جس نے تین دن کے اندر دو کروڑ روپے کا بندوبست کرنے کا مطالبہ کیا اور دھمکی دی کہ رقم نہ دی گئی تو لڑکی سے ہاتھ دھو بیٹھیں گے۔ اہلِ خانہ کا موقف ہے کہ لڑکی کو کسی نامعلوم شخص یا گروہ نے اغوا کر کے تاوان کا مطالبہ کیا ہے۔
پولیس نے اغوا برائے تاوان کے جرم میں مقدمہ درج کر کے تفتیش شروع کر دی۔
