اسلام آباد:وفاقی وزیر منصوبہ بندی اور ترقی احسن اقبال نے کہا ہے کہ پاکستان کا پہلا خلا باز 2026 میں خلا میں قدم رکھے گا۔
وفاقی وزیر منصوبہ بندی اور ترقی احسن اقبال نے اسلام آباد میں ہائی سپیڈ انٹرنیٹ اور کمرشل سیٹلائٹ کی افتتاحی تقریب سے خطاب کرتے ہوئے یہ خوشخبری سنائی ہے کہ پاکستان کا پہلا خلا باز اگلے برس 2026 میں خلا میں بھیجا جائے گا۔
انہوں نے کہا کہ کسی بھی تہذیب کی ترقی کا دارومدار اس کی خلائی ٹیکنالوجی کی دسترس پر ہے، خلائی ٹیکنالوجی اڑان پاکستان کے بنیادی ستون کے طور پر شامل ہے، پاکستان نے گزشتہ 2 سال میں اپنے 4 سیارے خلا میں بھیجے ہیں، پاکستان نے اپنے سیارے سے انٹرنیٹ سروس کی صلاحیت حاصل کر لی ہے، اب ہم فائبر، 5 جی، کمرشل سیٹلائٹ کے امتزاج سے جڑے پاکستان کی بنیاد رکھ رہے ہیں۔
ان کا کہنا تھا کہ ای پاکستان کا ہدف ملک کے ہر گوشے سے نوجوانوں کو دنیا سے جوڑنا ہے، ہر سکول اور صحت کے مرکز کو براڈ بینڈ سے جوڑنا ہماری ترجیح ہے۔
وفاقی وزیر نے کہا کہ ای پاکستان محض نعرہ نہیں بلکہ جدید معیشت اور گورننس کی بنیاد اور جدید ڈیجیٹل معیشت کی ریڑھ کی ہڈی ہے، اس ڈیجیٹل معیشت میں نوجوانوں کیلئے نئے روزگار کے لاکھوں مواقع پیدا ہوں گے۔
احسن اقبال کا مزید کہنا تھا کہ انٹرنیٹ اب محض رابطہ نہیں بلکہ پیداوار کا بنیادی انفراسٹرکچر ہے، ہر شہری تک تیز رفتار انٹرنیٹ کی رسائی یقینی بنائی جا رہی ہے، دور دراز علاقوں کو جوڑنے کے لئے سیٹلائٹ انٹرنیٹ اہم کردارادا کرے گا۔
