چینی کارساز کمپنی کا پاکستان میں پہلا پلانٹ لگانے کا اعلان

حکومت پنجاب نے سیلاب متاثرین کیلئے ایئر لفٹ ڈرون حاصل کر لیا

لاہور: پاکستان میں ریسکیو اینڈ ریلیف آپریشنز کیلئے اہم سنگ میل عبور کر لیا گیا۔

حکومت پنجاب نے سیلاب متاثرین کیلئے ایئر لفٹ ڈرون حاصل کر لیا، جدید ڈرون 200 کلوگرام تک وزنی شخص کو اٹھا کر محفوظ مقام تک منتقل کرنے کی صلاحیت رکھتا ہے۔

سیکرٹری داخلہ پنجاب نے سیلاب میں پھنسے افراد کو ریسکیو کرنے کیلئے جدید ایئر لفٹ ڈرون ملتان بھجوانے کی ہدایت کر دی، جنوبی پنجاب بھجوانے سے قبل لاہور میں سول ڈیفنس نے ڈرون کی ٹیسٹ فلائٹس مکمل کی ہیں۔

اس حوالے سے سیکرٹری داخلہ پنجاب کا کہنا ہے کہ سول ڈیفنس کیلئے 10 مزید ایئر لفٹ ڈرونز کی خریداری کا فیصلہ کیا گیا ہے، پاکستان میں یہ اپنی طرز کی پہلی ایمرجنسی ایئر لفٹ ڈرون سروس ہے، محکمہ داخلہ "پنجاب سول ڈیفنس ریزیلئنس کور" کو جدید خطوط پر استوار کر رہا ہے۔

سیکرٹری داخلہ پنجاب نے کہا کہ ڈرون سروس سے ناقابل رسائی اور خطرناک مقامات سے انسانوں کو محفوظ انداز میں ایئر لفٹ کیا جا سکتا ہے، سیلاب و ہنگامی صورتحال میں سول ڈیفنس جوان فرنٹ لائن سولجرز ہیں، سول ڈیفنس کے تربیت یافتہ اہلکار و رضاکار قیمتی انسانی جانیں بچا رہے ہیں، سول ڈیفنس ریزیلئنس کور میں شہریوں کی بطور رضاکار رجسٹریشن کا عمل بھی جاری ہے۔