حافظ آباد(نامہ نگار ،نمائندہ دنیا )چیئرپرسن پنجاب ویمن پروٹیکشن اتھارٹی حنا پرویز بٹ نے حافظ آباد کا دورہ کیا۔۔۔
جہاں انہوں نے اجتماعی زیادتی، اغوا، تشدد، بلیک میلنگ اور غیر انسانی سلوک کا شکار ہونے والی گلناز شہزادی ،کسوکی میں قتل ہونے والے 2بچوں کے لواحقین سے ملاقات کی۔ مانگٹ اونچا میں 25اپریل کو مسلح افراد نے خاتون کو اغوا کر کے شوہر کے سامنے اجتماعی زیادتی کا نشانہ بنایا تھا ۔ واقعہ کے 3 ملزم پو لیس مقابلے میں ہلاک ہو چکے جبکہ ایک زیر حراست ہے ۔ حنا پرویز بٹ نے متاثرہ خاتون کو ہر ممکن قانونی، طبی، نفسیاتی اور سکیورٹی معاونت فراہم کرنے کی یقین دہانی کرائی۔ انہوں نے مبینہ بد فعلی کے بعد قتل ہونے والے بچوں احمد علی اور عرشمان کے اہلِ خانہ سے ملاقات کی اور افسوسناک واقعہ پر رنج و غم کا اظہار کیا۔ حنا پرویز بٹ نے متاثرہ خاندان کو مکمل قانونی مدد اور انصاف کی فراہمی کی یقین دہانی کرائی ۔ 28 مئی کو کسوکی میں احمد علی اور عرشمان کو قتل کر کے لاشیں صندوق میں چھپا دی گئی تھیں۔ پولیس نے دونوں بچوں کی لاشیں برآمد کر کے ملزم انضمام کو گرفتار کیا جسے آلہ قتل کی برآمدگی کے لیے پولیس لے جا رہی تھی کہ گاڑی میں سوار ملزم نے ہتھکڑی چھڑوا کر نہر میں چھلانگ لگا کر خودکشی کر لی تھی۔
